Nasazlıq yaranan avtomobil qəzaya səbəb olub
Nərimanov rayonunda 3 avtomobilin iştirakı ilə zəncirvari yol qəzası baş verib.
Hadisə Ziya Bünyadov prospektinin rayon ərazisinə düşən hissəsində qeydə alınıb.
Əliyev Rəşad Musa oğlu idarə etdiyi “Mercedes” markalı avtomobillə hərəkətdə olarkən nəqliyyat vasitəsində nasazlıq yaranıb. Bu zaman Rəşad Əliyev avtomobili yol kənarında saxlayıb.
Arxadan gələn və Rzayev Fəxri Firudin oğlunun idarə etdiyi “Mercedes” markalı avtomobil həmin nəqliyyat vasitəsinə çırpılıb.
Zərbənin gücündən “Mercedes” Cəfərov Azər Azad oğlunun idarə etdiyi “Kia” markalı nəqliyyat vasitəsinə dəyib.
Hadisə nəticəsində xəsarət alan olmasa da, avtomobillərə ciddi ziyan dəyib.
Əraziyə Dövlət Yol Polis İdarəsinin əməkdaşları cəlb edilib. Hadisədən sonra yolda tıxac yaranıb.
YPX əməkdaşları tənzimləmə işləri aparıb.
Hadisənin təfərrüatı araşdırılır.
Kamil Əmirli
Elşad Mətləboğlu