Qaxın Sarıbaş kəndində Ramazan bayramı qeyd olunub
Azərbaycanın ən ucqar kəndindən biri də Qax rayonunun Sarıbaş kəndidir.
Sirlərlə dolu, ecazkar və bir çox tarixi izləri gələcəyə daşıyan Sarıbaş kəndində Ramazan bayramı qeyd olunub.
Qaxdan İlisuya asanlıqla getmək olsa da, İlisu kəndindən Sarıbaşa çatmaq o qədər də asan deyil. Sarıbaş kəndinə qədər olan yeddi kilometrlik enişli və yoxuşlu yollarda təkcə "UAZ" markalı avtomobillər hərək edə bilir.
Bir çox özəlliklərə malik olan Sarıbaş kəndi, sanki dağların ətəyində salınmış kiçik şəhərciyi xatırladır. Qədim zamanlardan kənddə sosial obyektlərin və hər cür infrastrukturun mövcud olması bunu deməyə əsas verir. Belə ki, kənddə daim elektrik enerjisi olub. Hətta Azərbaycanda ilk su elektrik stansiyası da məhz bu kəndə quraşdırılıb. Sarıbaşda 360 şagird yerlik ümumorta məktəb binası, telefon qovşağı, 25 çarpayılıq xəstəxana, kitabxana və hələ də fəaliyyətinə davam edən 1954-cü ildə inşa olunan mədəniyyət evi var.
Dağlarla əhatə olunan Sarıbaş kəndi qış aylarında bürünən ağ örpəyi, yayda isə yaşıl yaylaqları ilə göz oxşayır.
“Ala göz”, “Qaya altı”, “Daş üçən”, “Çanaxor”, “Qarşı dağ”, “Günaxay” dağlarının əhatəsində yerləşən kəndin coğrafi mövqeyi elə seçilib ki, burada qış ayları daha sərt deyil, əksinə mülayim keçir. Sarıbaş kəndində əvvəllər 1000-dən çox sakin yaşayıb. Lakin 1964-cü ildə dağ kəndlərinin arana köçürülməsi qərarı ilə bu kəndin əhalisini aranda salınmış Cəlayır kəndinə köç etməyə məcbur edib.
Buna baxmayaraq, doğulub boya-başa çatdığı kəndi tərk edə bilməyən, bu kəndi yaşatmağa davam edən kənd sakinləri də var. Hazırda kənddə 30-a yaxın ailə yaşayır.
Qaxdan iyirmi, İlusu kəndindən yeddi kilometr şimal-qərbdə, böyük Qafqaz sıra dağlarının ətəyində yerləşən möcüzələr diyarı, hər daim qonaqlı-qaralı olub. Qədim Türk eli kimi bilinən Sarıbaş kəndi haqqındakı tarixi faktlar buraya bir çox elm xadimlərini cəlb edib. Belə ki, 1394-cü ildə Əmir Teymur şimala yol almaq üçün, XVIII əsrdə Nadir şah Dağıstanı fəth etmək üçün məhz Sarıbaş yolundan istifadə edib. Həmçinin, Sarıbaş Rusların Qafqaz xalqlarını imperiyaya tabe etdirmək üçün apardığı müharibələrə şahidlik edib.
İlisu sultanı Daniyal bəyin Qafqaz dağlılarının lideri Şeyx Şamilin "Azadlıq ordusu"na məhz Sarıbaşdan keçərək qoşulması da tarixi faktlardandır.
İlkin Piranov