Gəncə terrorunun şahidləri Azərbaycanın həbs etdiyi separatçılardan danışdı

Vətən müharibəsi zamanı Ermənistan cəbhə xəttindən on kilometrlərlə uzaqlıqda yerləşən bir neçə yaşayış məntəqəsinə terror hücumları həyata keçirdi. Təkcə Gəncədə reket hücumlarından şəhid olan mülki şəxslərin sayı 26, yaralıların sayı isə 100-dən artıq idi.

Həmin vaxt bu hücumlara göstəriş verdiyini etiraf edən separatçı rejim başçısı Araik Arutyunyan indi Azərbaycan qanunları qarşısında cavab verir. Bu, hər bir azərbaycanlı üçün, xüsusilə də terrordan əziyyət çəkənlər üçün qürur və təsəllidir.

Raket hücumu nəticəsində atası həlak olan Ramiz Ağayevin özü və dörd ailə üzvü də xəsarət alıb.

O, separatçıların həbs xəbərini alarkən keçirdiyi sevinc hissindən danışıb: “Araikin gətirildiyini görəndə çox sevindik. Atamın, qonşularımın məzarını ziyarətə gedəndə özümü gücsüz, günahkar hiss edirdim”.