Milyonlarla manat pulu mənimsəməkdə ittiham edilən iş adamı növbəti dəfə məhkəmə qarşısında
Bakıda vətəndaşlara qarşı milyonlarla manatlıq dələduzluq etməkdə təqsirləndirilən Cahangir Qənbərovun cinayət işi üzrə məhkəmənin növbəti baxış iclası keçirilib.
Bakı Ağır Cinayətlər Məhkəməsinin hakimi Səbinə Məmmədzadənin sədrliyi ilə baş tutan prosesdə təqsirləndirilən Cahangir Qənbərovun məhkəmədə sərbəst ifadəsi dinlənilib. O, ifadəsi zamanı cinayət işində əsas zərərçəkən kimi tanınan Əhməd Mütəllimov tərəfindən digər zərərçəkənlərin külli miqdarda vəsaitinin mənimsənilməsini iddia edərək buna görə özünün dələduzluqda təqsirləndirilməsini əsassız hesab edib.
Bununla yanaşı, Cahangir Qənbərov ifadəsi zamanı daha bir neçə şəxsin istintaq zamanı zərərçəkən kimi təqdim edilərək, lakin cinayət işində həmin şəxslərin adının olmamasını məhkəmənin diqqətinə çatdırıb. Onların arasında özəl şirkətlərdən birinin rəhbəri Dilbər Aslanovanın olduğunu bildirib.
Qeyd edək ki, ittihamda bildirilir ki, Cahangir Qənbərov müxtəlif vaxtlarda paytaxt sakinləri – fərdi sahibkarlıqla məşğul olan Əhməd Mütəllimov, Tamerlan Rəşidov, Hacıbala Məlikov və Liliya Muxiyevanın etibarından süi-istifadə edərək müxtəlif şərti biznes qurmaq adı ilə aldadaraq onların 2 milyon manatadək pullarını mənimsəyib. Onun barəsində Cinayət Məcəlləsinin dələduzluq – xüsüsilə külli miqdarda ziyan vurmaqla törədildikdə maddəsi ilə ittiham irəli sürülüb.