Ana səhifə Dünya Etirazlar zamanı 3000-dən çox şəxs saxlanılıb
Ölçünü dəyiş

Etirazlar zamanı 3000-dən çox şəxs saxlanılıb

Dünya
13 Noyabr 2019, 22:50
20 görüntü
0
Paylaş:

Honq Konqda demokratiya tələbilə başlayan etiraz davam edir.

Artıq beş aydan çox davam edən iğtişaşlara Honq Konq Dövlət Universiteti başda olmaqla, müxtəlif universitetlərin tələbələri də qoşulub.

Etiraz nümayişləri zamanı demokratiya tələb edən kütlələrlə çevik qüvvələr arasında qarşıdurma yaranıb.

Polis etirazçılara gözyaşardıcı qaz və plastik güllələrlə qarşılıq verib. Nümayişçilər xüsusi bariyerlər hazırlayıb. Demokratiya tələb edən etirazçılar polisə benzin və digər yandırıcı maddələr olan şüşələr atıb.

Hökumət iğtişaşların baş verdiyi ərazilərdə məktəb və ticarət mərkəzlərini bağlamağa məcbur olub. Habelə, strateji əhəmiyyətli dəmiryolu şəbəkəsinin böyük hissəsi də fəaliyyətini dayandırıb.

Dünya mətbuatında yer alan məlumatlara görə, polis şəhərin tamamilə dağılmaq ərəfəsində olduğu ilə bağlı açıqlama yayıb.

1997-ci ildə İngilislərin geri qaytardığı bir sıra əyalətləri idarə etməkdə çətinlik yaşayan Çin hökuməti etiraz nümayişlərinə ciddi təzyiq göstərməyəcəyini bildirib. Lakin iğtişaşlar geniş vüsət aldığından polis qüvvələri təhlükəsizlik tədbirlərinin sərt olacağını açıqlayıb.

ABŞ Dövlət Departamentinin sözçüsü Morqan Ortaqus tərəfləri təmkinli olmağa çağırıb.

Qeyd edək ki, əvvəlcə etirazlar cinayət şübhəlilərinin Çinə göndərilməsini təmin edəcək ekstradisiya qanun layihəsinə qarşı başlayıb. Daha sonra əhali Honq Konqda tam demokratiya tələbilə çıxış edib. Nümayiş başlayandan bu günə qədər 3000-dən çox etirazçı saxlanılıb.

Kamil Əmirli

Şərhlər