İranın terrorçulara yardımının şəkilli sübutu

“İran ticarət gəmilərini pilotsuz uçuş aparatları və raket sistemləri ilə silahlandırır”.

Bu barədə İsrailin müdafiə naziri Yoav Qallant Tel-Əviv yaxınlığındakı Herzliyada keçirilən təhlükəsizlik konfransında çıxışında bildirib.

Müdafiə naziri İranın ticarət gəmilərini kəşfiyyat məlumatlarının əldə edilməsinə imkan verən döyüş gəmilərinə çevirməyə çalışdığını qeyd edib. Y.Qallant İrana aid 6 gəminin şəkillərini də göstərib və bildirib ki, onlardan 5-i terrorçuların üzən bazalarıdır.

“Gəmilərdən biri bu yaxınlarda Ədən körfəzinə doğru istiqamət alıb. Tehran uzun müddət İrandan uzaqda qala biləcək terrorçular üçün üzən bazalar tikir. Bu isə İranın Fars körfəzi və Ərəbistan dənizinə tətbiq etdiyi terror aktları ilə birbaşa bağlıdır”, – deyə nazir əlavə edib.

İsrailin müdafiə naziri eyni zamanda bildirib ki, İran öz fəaliyyətini Hind okeanına, Qırmızı dənizə, eləcə də Aralıq dənizinə qədər genişləndirməyə çalışır. Bu fəaliyyətlər isə hərbi, mülki, ticarət və hava yollarının təhdidi, eləcə də dəniz arenasında daimi təhlükə deməkdir.