Netanyahu: HƏMAS-ın olduğu bütün bölgələri yerlə-yeksan edəcəyik

İsrail rəsmiləri son hadisələrlə əlaqədar HƏMAS silahlılarına sərt xəbərdarlıq ediblər.

Ölkənin Baş naziri Benyamin Netanyahu hər yeri bombalayacaqlarını, HƏMAS-ın mövcud olduğu bütün bölgələri yerlə-yeksan edəcəklərini bildirib. O həmçinin Qəzza zolağındakı mülki əhaliyə də çağırış edərək HƏMAS silahlılarının yanında olmamalarını, misli görünməmiş bombardman olacağını da dilə gətirib.

İsrailin müdafiə naziri Yoav Qalant isə öz növbəsində əhaliyə çağırış edərək vətəndaşlardan qərarlı olmalarını və təhlükəsizlik qüvvələrini dəstəkləmələrini xahiş edib.

Qeyd edək ki, hazırda bölgədə vəziyyət gərgin olaraq qalmaqdadır. Hər iki tərəfdən mülki şəxslər də daxil olmaqla yüzlərlə şəxs həyatını itirib və yaralanıb.