Netanyahunun nəzarətə götürdüyü ərazilər Mahmud Abbasa verilə bilər

Qəzza zolağı müvəqqəti olaraq Böyük Britaniyanın sabiq Baş naziri Toni Bleyer tərəfindən idarə oluna bilər.

“Le Monde”nin məlumatına görə, İsrail-HƏMAS savaşı bitəndən sonra Toni Bleyer Qəzza zolağında müvəqqəti nazir vəzifəsini icra edə bilər və hazırda əsas namizədlərdəndir.

Siyasətçi Qəzzanın gələcəyi ilə bağlı uğurlu fəaliyyət göstərəcəyinə inanır. O bununla bağlı sentyabrın 26-da “The Daily Telegraph”a müsahibə verib.

Leyboristlərin 72 yaşlı lideri bir neçə aydır ki, Qəzza üçün inkişaf planı hazırlayır. Toni Bleyer bu işi Qlobal Dəyişikliklər İnstitutu ilə birgə görür. Bu mövzuda Toni Bleyeri ABŞ Prezidenti Donald Trampa yaxın insanların, amerikalı siyasətçilərin də dəstəklədiyi barədə məlumat var.

Qeyd edək ki, bu planın reallaşması üçün İsrail HƏMAS-a qarşı hərbi əməliyyatları dayandırmalıdır. Bundan sonra Toni Bleyer Qəzzaya rəhbərlik edəcək. Onun müvəqqəti nazir postunu tutduğu vaxt kəsiyində Qəzza xarabalıqlarının yenidən qurulması, iqtisadiyyatın böhran vəziyyətindən çıxarılması gözlənilir. Fələstin dövləti tanınandan sonra isə Toni Bleyer Qəzzaya nəzarəti Mahmud Abbas hökumətinə təhvil verəcək.