Rusiya Kiyevi ballistik raketlərlə vurdu | Ölən və yaralananlar var - Baku TV

Rusiya Ordusu Ukraynanın paytaxtı Kiyev şəhərinə dron, eləcə də ballistik və qanadlı raketlərlə hava zərbələri endirib.

Nəticədə, 56 nəfərin müxtəlif dərəcəli bədən xəsarətləri aldığı, 2 sakinin isə öldüyü bildirilir.

Kiyev Dövlət Hərbi Dairəsinin rəisi Timur Tkaçenko şəhər üzrə 40-dan çox obyektin zədələndiyini diqqətə çatdırıb.

Şəhər meri Vitali Kliçkonun sözlərinə görə, raket zərbəsindən “Lukyanovka” metrosunun tavanı uçub, həmin ərazinin yaxınlığında yerləşən bazar isə tamamilə yanıb. Şevçenko rayonunda isə orta məktəbə ziyan dəyib.

Hücumların nəticələrinin aradan qaldırılması istiqamətində işlərin davam etdirildiyi vurğulanıb.

Bu arada Ukrayna Ordusunun Luqanskda kollecə PUA zərbəsi endirməsi zamanı 18 nəfərin öldüyü, 60 nəfərin isə yaralandığı bildirilib.

Bu barədə ölkənin Fövqəladə Hallar Nazirliyi açıqlama verib.

Ərazidə axtarış-xilasetmə əməliyyatlarının başa çatdığı və hadisə nəticəsində ölənlərin hamısının dağıntılar altından çıxarıldığı qeyd olunub.

Xatırladaq ki, dron zərbəsi endirilərkən yataqxanada 14-18 yaş arası 86 nəfərin olduğu barədə məlumat yayılıb.