Bakıda 3 avtomobil toqquşub, 5 nəfər yaralanıb

Binəqədi rayonunda 3 avtomobilin iştirakı ilə yol qəzası baş verib.

Hadisə Ziya Bünyadov prospektində qeydə alınıb.

İlkin məlumata görə, 25 yaşlı Naqutin Aleksandr Valerieviç sərxoş halda və yüksək sürətlə idarə etdiyi “10-MD-081” dövlət nişanlı nişanlı “BMW”markalı avtomobillə metronun “Koroğlu” stansiyası istiqamətində hərəkətdə olarkən idarəetməni itirib.

Bu zaman avtomobil əks yola keçib. Nəticədə avtomaşın əks hərəkət zolağı ilə hərəkətdə olan və Tural Rəhmanovun idarə etdiyi “99-FE-712” dövlət nömrə nişanlı “BMW”və “Opel”markalı nəqliyyat vasitələrinə çırpılıb.

Qəza zamanı hər iki “BMW”markalı avtomobillərin sürücüləri, eləcə də, sərnişinlər, hamilə vəziyyətdə olan Marina adlı xanım, 23 yaşlı Quliyev Teymur Tofiq oğlu və Elvin Niftəliyev xəsarət alıblar.

Yaralılar 1 saylı Şəhər Klinik Xəstəxanasına yerləşdirilib. Hamilə olan Marina adlı xanımın vəziyyətinin ağır olduğu bildirilib. Aleksandr Naqutinə sol qolun və sağ bud sümüyünün sınığı, Teymur Quliyevə isə qapalı kəllə-beyin travması diaqnozu qoyulub.

Hadisə nəticəsində avtomobillər deformasiyaya uğrayıb, nəqliyyat vasitələrinin benzini yola dağılıb.

Qəza səbəbindən yolun hər iki istiqamətində tıxac yarandığından hərəkət məhdudlaşdırılıb.

Əraziyə FHN-in Xüsusi Riskli Xilasetmə Xidmətinin briqadası və DYP əməkdaşları cəlb edilib. YPX əməkdaşları tənzimləmə işləri aparıb, sürücüləri alternativ yolla hərəkət etmələri üçün istiqamətləndirib.

Hadisənin təfərrüatı araşdırılır.

Kamil Əmirli
Elşad Mətləboğlu