6-cı sinif şagirdinin Kürdə axtarışı davam edir

Kür çayında çimərkən batan 13 yaşlı Şirvan sakini Yusif İsgəndərovun axtarışları davam edir.

Hadisə şahidi Rəhim Həsənlinin sözlərinə görəi, Yusif çayda olarkən ayağı yerə çatmadığı üçün ona yardım etmək istəyib: “Çaydan kənara çıxarkən Yusifin digər tayda boğulduğunu gördüm”.

6-cı sinif şagirdi olan Yusifin təhsil aldığı Bayramlı qəsəbə 3 saylı tam orta məktəbdən şifahi olaraq bildirilib ki, mayın 24-də Yusif və onunla bərabər çimmək üçün Kür çayına gedən iki şagird dərsə gəlməyib. Bu barədə onların valideynlərinə məlumat verilib.

Bu gün isə məktəbin dəhlizində Yusifin xatirə fotosu qoyulub. Divarlarda isə sinif yoldaşlarının ürək sözləri yazılıb.