Zəncirvari qəzada 7 maşın toqquşub, 5 nəfər yaralanıb

23 iyul 2019 4040 baxış

Nərimanov rayonunda 7 maşın toqquşub, 5 nəfər yaralanıb.

Ziya Bünyadov prospektilə hərəkətdə olan “Schacman” markalı yük maşını əvvəlcə qarşısına çıxan "BMW" markalı avtomobilə, daha sonra isə "Ravon" və 2 ədəd “Mercedes”, “Volkswagen”, “NAZ Lifan” markalı maşınlara çırpılıb.

Hadisə nəticəsində "BMW"-də olan 1 ailənin 3 üzvü - sürücü 54 yaşlı Əhmədov Şirxan İlya oğlu qol və baş nahiyəsindən, onun həyat yoldaşı, 54 yaşlı Quliyeva Reyhan Gəray qızı və onların övladı 24 yaşlı İlyaszadə Mirvari Şirxan qızı müxtəlif dərəcəli bədən xəsarətləri alaraq xəstəxanaya çatdırılıb. “Volkswagen” markalı avtomobildə olan 2 xanım da xəsarət alıb. Onlara ilkin tibbi yardım göstərilib.

İlkin ehtimala görə, hadisə “Schacman” markalı yük maşınının tuneldən çıxarkən yüksək sürətlə hərəkətini davam etdirməsi səbəbindən baş verib.

Hadisə yerinə təcili tibbi yardım və DYP əməkdaşları cəlb olunub.

Qəzadan sonra ərazidə güclü tıxac yaranıb. DYP əməkdaşları tıxacın qarşısının alınması istiqamətində tədbirlər görüblər.

Faktla bağlı araşdırma aparılır.

Kamil Əmirli

Elşad Mətləboğlu

Kopyalandı