Ermənistan müxalifətinin Paşinyana “etimadsızlıq nakamlığı”

Ermənistan parlamentinin dövlət-hüquq məsələləri üzrə komissiyası müxalif “Şərəfim var” fraksiyasının “Baş nazirə etimadsızlıq bəyanatı layihəsi”nə mənfi rəy verib.

Bəyanat layihəsində bildirilir ki, hökumət öhdəliklərini yerinə yetirməyib, idarəetmənin bütün sahələrində sistemli böhran yaradıb və ölkə üçün yeni çağırışların mənbəyi olub. Səbəblər arasında Qarabağ məsələsi, milli təhlükəsizlik strategiyasının uğursuzluğu, korrupsiyanın artması, iqtisadi geriləmə, humanitar böhran və müttəfiqlərlə münasibətlərin pisləşməsi göstərilir.

Fraksiyanın təklifi vəziyyəti sabitləşdirmək, demokratiyanı bərpa etmək və azad seçkilər keçirmək üçün milli birliyin keçid hökumətinin yaradılmasıdır.

Ermənistan parlamentində müxalifətin təqdim etdiyi milli böhran və dövlət idarəçiliyinin uçuruma yuvarlanması məsələsi də müzakirə olunub. Hakim “Vətəndaş Müqaviləsi” partiyasından olan deputat Alxas Kazaryan müxalifətin sadalanan təşəbbüslərini “mənasız” adlandırıb.

Beləliklə, Ermənistanda 44 günlük müharibəni araşdıran komissiyanın hesabatı da parlamentin arxivinə verilib. Çünki sənəd vaxtında təhvil verilməyib.