Ölkəmiz daha bir təşkilata sədrlik edəcək

2023-cü ildə İqtisadi Əməkdaşlıq Təşkilatına sədrliyi Azərbaycan edəcək.

Bununla bağlı qərar Özbəkistanın paytaxtı Daşkənddə yanvarın 24-də təşkilata üzv ölkələrin Xarici İşlər Nazirlər Şurasının 26-cı iclasında qəbul olunub. İclasda çıxış edən xarici işlər naziri Ceyhun Bayramov Zəngəzur dəhlizinin bütün bölgə ölkələri arasında əməkdaşlığın inkişafı üçün xüsusi əhəmiyyət daşıdığını vurğulayıb.

Həmçinin enerji təhlükəsizliyinin təmin edilməsi sahəsində Azərbaycan tərəfindən aparılan işlər barədə ətraflı məlumat verilib, ötən ilin iyul ayında ölkəmizlə Avropa İttifaqı arasında imzalanmış Anlaşma Memorandumunun yaşıl enerji resurslarının inkişafı, eləcə də Azərbaycan, Gürcüstan, Rumıniya və Macarıstan arasında Qara dənizin altından keçməklə elektrik enerjisi kabelinin çəkilməsi layihəsinin bölgədə əməkdaşlığın daha da genişlənməsinə töhfə verəcəyi bildirilib.

İclasda həmçinin Daşkənd Kommünikesi qəbul olunub, Azərbaycan-Ermənistan münasibətlərinin tənzimlənməsi dəstəklənib, Zəngəzur dəhlizi üzrə rəsmi Bakının gördüyü işlər alqışlanıb.

Kommünike çərçivəsində həmçinin Azərbaycanla Ermənistan arasındakı dövlətlərarası münasibətlərin – ərazi bütövlüyünün və suverenliyin qarşılıqlı şəkildə tanınması və hörmət əsasında tənzimlənməsi, bölgədə mehriban qonşuluq əlaqələrinin yaradılmasına verəcəyi dəstək ifadə edilib.

Qeyd edək ki, Ceyhun Bayramovun yüksək səviyyəli ikitərəfli görüşlərinin keçirilməsi nəzərdə tutulur.