Regional inteqrasiya planı reallığa çevrilir

Cənubi Qafqazda son günlər diqqətçəkən proseslər baş verir. Ermənistan rəhbərliyi açıq şəkildə bildirir ki, nəqliyyat kommunikasiyalarının açılması artıq sadəcə, plan deyil, yaxın gələcəyin reallığıdır.

Baş nazir Nikol Paşinyanın Tsaxkadzorda verdiyi bəyanat da təsadüfi deyil. O, regional infrastrukturun, xüsusilə də Ermənistanla Azərbaycan arasında dəmir yolunun işə düşməsinin ölkə iqtisadiyyatına, o cümlədən dağ-mədən sənayesinə yeni nəfəs verəcəyini deyir.

Bu optimizmin fonunda isə xarici işlər naziri Ararat Mirzoyan daha konkret danışır. Onun sözlərinə görə, Sünikdən keçəcək və “Tramp marşrutu” adlanan yolun tikintisi azı iki il çəkə bilər. Hazırda ABŞ nümayəndələri ilə marşrut, şirkət və texniki detallar müzakirə olunur.

A.Mirzoyan bildirir ki, Ermənistan bu prosesin əsas benefisiarlarından biri olacaq, çünki həm daxili daşımaları təmin edəcək, həm də Azərbaycanın infrastrukturundan istifadə imkanı qazanacaq.

Amma diqqətçəkən məqam odur ki, bu kommunikasiya layihələri paralel olaraq regionda yeni siyasi səhifə açmaq üçün vasitə kimi təqdim olunur. ABŞ-nin vasitəçiliyi ilə imzalanan Vaşinqton Bəyannaməsi də göstərir ki, artıq bu yol təkcə Naxçıvanla Azərbaycanın əsas hissəsini birləşdirməyəcək, həm də beynəlxalq güclərin bölgədəki təsirini artıracaq.

Bütün bunlarla yanaşı, Ermənistan-Türkiyə münasibətlərində də hərəkətlilik müşahidə olunur. On illərlə siyasi səbəblərdən qarşısı alınan “Türk Hava Yolları”nın Ermənistana uçuşları artıq reallığa çevrilmək üzrədir.

Deputat Sarkis Xandanyan hesab edir ki, hüquqi və texniki məsələlər həll olunandan sonra bu addım tezliklə atılacaq. Sərhədlərin bağlı olduğu, diplomatik münasibətlərin isə üç onillikdir mövcud olmadığı iki ölkə arasında bu dəyişiklik təsadüfi deyil. Ankara ilə İrəvan arasında başlayan dialoq indi praktik addımlara çevrilir. Bu, yalnız hava nəqliyyatı ilə məhdudlaşmır – əslində, bölgədə paralel gedən ümumi prosesin – kommunikasiya xətlərinin açılması və inteqrasiya imkanlarının genişlənməsinin tərkib hissəsidir.

Beləliklə, Ermənistanın regiondakı strateji mövqeyi həm Azərbaycanla dəmir yolu layihəsi, həm də Türkiyə ilə aviasiya əməkdaşlığı fonunda tamamilə yeni mərhələyə qədəm qoyur.