Mediada dil qaydalarının pozulmasına qarşı sərt tədbirlər həyata keçiriləcək - Baku TV

"Televiziya və radiolarda əcnəbi sözlərin çox işlədilməsi ilə bağlı kanallara xəbərdarlıq olunacaq".

Bunu Audiovizual Şuranın sədri İsmət Səttarov Milli Məclisdə keçirilən "Azərbaycan dilinin dövlət dili kimi inkişaf strategiyası: Mövcud vəziyyət və perspektivlər" adlı konfransda çıxışı zamanı deyib.

İsmət Səttarov verilişlərdə vəziyyətin qənaətbəxş olmadığını bildirib:

"Televiziya və radiolarda 800 saatlıq efirlər olur. Monitorinq şöbəsində də 6 nəfərin olduğunu nəzərə alsaq, bunun hamısını aşkar etmək mümkün olmur. Amma dövlət başçısının çıxışını əsas götürərək süni intellektdən yararlandıq və daha çox istifadə olunan 40-a yaxın əcnəbi sözün siyahısını çıxarıb proqrama daxil etdik. Ümumilikdə aparıcıların iki həftə ərzində 3 minə yaxın əcnəbi söz işlətməsinin şahidi olduq. Məsələn, "okay" sözü aparıcılar tərəfindən 104 dəfə işlədilib. Bununla bağlı yanvar ayından kanallara xəbərdarlıq göndərəcəyik".