"İstifadə edib, yarı yolda qoydular" - Əlil idmançı üçün nə qədər pul lazımdır? - ARZUNUN VAXTI

“Arzunun vaxtı” verilişinin yeni buraxılışı yayımlanıb.

Budəfəki buraxılışın qonağı əlilliyi olan ağır atlet, dəfələrlə Azərbaycan çempionu və gənclər arasında Avropa çempionu Rüstəm İmanzadədir.

1998-ci il təvəllüdlü idmançı 2014-cü ildə qatıldığı Avropa çempionatında 148 kiloqram ağırlığı qaldırarkən sağ qolunun qırılması və ştanqın belinə düşməsi nəticəsində ağır zədə alıb.

İdmançı bildirir ki, zədələnməsinin əsas səbəbi ardıcıl və kifayət qədər bərpa müddəti olmadan yarışlara çıxarılmasıdır:

“2014-cü ildə böyüklər arasında dünya çempionatına qatıldım. 16 yaşım var idi və 34 yaşa qədər idmançılarla mübarizə aparırdım. Cəmi 20 gün sonra isə məni gənclər arasında Avropa çempionatına göndərdilər. Halbuki ağır atletikada yarışlar arasında ən azı 3 ay fasilə olmalıdır. Güclü olduğuma görə məni hər yarışa aparırdılar və getməsəm milliyə salınmayacağımı, maaşımın kəsiləcəyini deyirdilər. İndi anlayıram ki, məndən istifadə olunub və məni yarı yolda qoyublar”.

Ağır zədədən sonra 11 ildir ki, yeriyə bilməyən Rüstəmin sözlərinə görə, əməliyyatdan sonra həkimlər 5 ilə tam sağalacağını desələr də, fizioterapiyanın davamlı aparılmaması bu prosesi ləngidib:

“Artıq ayaqlarımı hərəkət etdirə bilirəm. Fizioterapiya dayandırılmasaydı, bəlkə də sağalıb idmana qayıda bilərdim”.