“Son görüşümüz belə oldu, çox ağırdır...” | Doğmaları “Aşıq Yediyar”ın xatirəsini yad etdi

Əməkdar artist, Şuşa Dövlət Musiqili Dram Teatrının direktoru Yadigar Muradov uzunsürən xəstəlikdən sonra həyatını itirib.

Onun qohumları, yaxınları və sənət yoldaşları Şuşa Dövlət Musiqili Dram Teatrında Yadigar Muradovun xatirəsini yad etmək üçün toplaşıblar.

“Yadigar müəllim böyük sənətkar, Şuşa Dövlət Musiqili Dram Teatrının yaradıcısı idi. Bu teatrın ağır yüklərini öz çiynində daşımışdı”, – Xalq artisti Şükufə Musayeva söyləyib.

Əməkdar jurnalist Mübariz Əsgərov isə Yadigar Muradovla son görüşündən danışıb.

“Yadigar Muradov komaya düşməzdən əvvəl onunla yeni layihəmiz barədə danışmışdıq. Mənə “səs tellərim düzələndə başlayarıq” demişdi. Son görüşümüz belə oldu. Dostumu, yaradıcı bir insanı itirmək mənim üçün çox ağırdır”, – deyə o bildirib.

Qeyd edək ki, vida mərasimindən sonra Əməkdar artist Yadigar Muradov Badamdar qəbiristanlığında dəfn olunub.