Green Card qeydiyyatı pullu ola bilər | Yeni qaydalar müzakirə olunur

ABŞ Dövlət Departamenti insanların ölkədə daimi yaşayış icazəsi ‒ "green card" əldə etməsinə imkan verən illik lotereya üçün 1 dollarlıq qeydiyyat rüsumunun tətbiqini təklif edib.

Bu barədə ABŞ Federal Reyestrindən məlumat verilib.

Qeyd olunur ki, bu addım lotereyada iştirak edən hər kəsin üzərinə bərabər maliyyə yükünün düşməsini təmin etmək məqsədi daşıyır.

Yeni qayda oktyabrın əvvəlində başlayacaq proqram mövsümündən əvvəl qüvvəyə minəcək. Dəqiq tarixlər daha sonra açıqlanacaq. Seçilmiş namizədlər üçün nəzərdə tutulan 330 dollar rüsum isə dəyişməz olaraq qalır.

Qeyd edək ki, 1990-cı ildən tətbiq edilən proqram çərçivəsində hər il 50 min nəfərə təsadüfi seçim əsasında ABŞ-də daimi yaşayış icazəsi ‒ "green card" verilir. Əvvəllər lotereyada iştirak tamamilə pulsuz idi.