Kiyevə kütləvi hücum edildi: Sakinlər qorxu içində - Baku TV

Mayın 24-ü gecədən səhərə qədər Ukrayna paytaxtı Kiyev yenidən kütləvi raket və dron hücumlarına məruz qalıb.

Paytaxtın mərkəzi və ətraf rayonları, o cümlədən Şevçenko rayonunda yerləşən “Lukyanovka” bazarının ətrafı ciddi dağıntılara uğrayıb.

Ukrayna Silahlı Qüvvələrinin Baş Qərargahından bildirilib ki, Rusiya Ordusu ümumilikdə Oreşnik də daxil olmaqla 90 ballistik raket və 600 dron buraxıb. Zərbələrin böyük əksəriyyəti havada zərərsizləşdirilsə də, bir qismi hədəflərə dəyib. Nəticədə, Azərbaycanın Ukraynadakı səfirliyinin binasına da zərər dəyib.

“Zərbə dalğası o qədər güclü idi ki, bizi zirzəmidə də silkələdi. Bütün sakinlər qorxu içində idi, nə edəcəyimizi bilmirdik. Səhərə qədər sığınacaqda qaldıq”, – deyə Kiyev sakini bildirib.

“Saat təxminən üçdən raketlər uçmağa başladı. Gecəni çox ağır keçirdik, bazara bir neçə raket düşdü. Hər şey bir anda baş verdi, qorxulu idi”, – başqa bir sakin əlavə edib.