"Makron"u relsə uzandırdılar

Fransada etirazçılar Prezident Emmanuel Makronun müqəvvasını dəmir yolu relsinin üstünə uzandıraraq şəhərətrafı qatarların hərəkətini dayandırıblar.

Məlumata görə, həftə sonu ölkə küçələrində hakimiyyətə qarşı tənqidlər və yeni iğtişaş qorxuları artır. Hökumət bu günə qədər ümummilli iğtişaşlara səbəb olan nümayişlərə nəzarəti ələ ala bilməyib. Kütləvi mitinqə səbəb ölkədə pensiya yaşının 64-ə qaldırılmasıdır. Fransada mübarizə aparan həmkarlar ittifaqının qarşıdan gələn günlərdə Makron hökumətinə daha çox təzyiq göstərib, daha çox etiraz aksiyası keçirəcəyi planlaşdırılır.

Qeyd olunub ki, bir həftədən çox davam edən mitinq səbəbindən hətta Britaniya kralı III Çarlzın Fransaya çoxdan gözlənilən səfəri ləğv edilib. E.Makron isə Brüsseldə Avropa Birliyi sammitindən sonra keçirilən mətbuat konfransında bildirib ki, zorakılığa heç bir halda güzəşt edilməyəcək.