Rusiyanı şoka salacaq müdafiə | Ukrayna ABŞ "Patriot"una elə bir alternativ yaradır ki... - Baku TV

Ukraynaya artan ballistik hücumlar və onların qarşısının alınmasının çətinliyi ciddi narahatlığa səbəb olub. Xüsusilə bu hücumların digər Avropa ölkələrini də təhdid etməsi fonunda rəsmi Kiyev qonşu ölkələri birgə ballistik müdafiə sistemi yaratmağa çağırıb.

Prezident Volodimir Zelenski bildirib ki, Ukrayna hələ sovet dövründən qalan baza üzərində ənənəvi potensialını saxlayır və onu bərpa etmək üçün dəstəyə ehtiyacı var.

Mövzu ilə bağlı Baku TV-yə açıqlama verən Ukrayna Ali Radasının komitə sədri Fedor Venislavski qeyd edib ki, dördillik müharibə Ukraynanın Rusiya ərazisinə 500 kilometrə qədər zərbə endirə bilən ballistik raketlər yaratmaq üçün həm elmi, həm hərbi, həm də sənaye potensialına malik olduğunu göstərib.

F.Venislavski həmçinin qeyd edib ki, minlərlə kilometrə çata bilən raketlər mövcuddur və Rusiya artıq bu təhlükəni ciddi qəbul edir. Lakin ballistik raketlər mövcud hava hücumuna qarşı müdafiə vasitələri ilə əngəllənməsi çətin olan zərbə vasitələridir.

“Böyük hesabla ballistik raketlərə qarşı Amerikanın “Patriot” sistemləri effektivdir, lakin qanadlı raketlərə qarşı zəif işləyir. Buna görə də bütün demokratik ölkələrin hərbi sənaye kompleksi üçün prioritet ballistik raketlərə qarşı müqavimət sistemi yaratmaqdır. Biz avropalı tərəfdaşlarımızla birlikdə “Patriot” sisteminin müasir analoqunun alternativini işləyib hazırlayırıq və xarici tərəfdaşların maliyyə dəstəyi ilə qısa müddətdə istənilən düşmənin ballistik raketlərinə qarşı effektiv müdafiə vasitəsi yarada bilərik”, – deyə o vurğulayıb.