2 qadın xəstəxanalıq oldu | Metro niyə bağlandı? | "Ödəniş edəndən sonra dedilər ki..." - Baku TV

Aprelin 21-i saat 12:10 radələrində “Ulduz–Nərimanov” mənzilində təmas relsinə yüksək gərginliyin verilməsində nasazlıq yaranıb.

Təhlükəsizlik məqsədilə “Ulduz” və “Nərimanov” stansiyalarında sərnişinlərin təxliyəsi həyata keçirilib. Bu səbəbdən qatarların “Nərimanov–Əhmədli” istiqamətində hərəkəti məhdudlaşdırılıb. Sərnişinlərin giriş-çıxışına da məhdudiyyət qoyulub.

“Bakı Metropoliteni” QSC-nin mətbuat katibi Bəxtiyar Məmmədov bildirib ki, “Ulduz–Nərimanov” mənzilində aralıq kabeldə baş verən qısaqapanma nəticəsində təmas relsinə gərginliyin verilməsində kəsinti yaranıb:

“Sadə dillə desək, “Bakı Metropoliteni” qatarlarının hərəkətinin əsas təminatverici qüvvəsi elektrik enerjisidir. Yüksək gərginlikli elektrik enerjisinin verilməsi kəsildiyi üçün həmin mənzildə qatarların hərəkəti mümkün olmayıb. Hadisə baş verən anda metropoliten xətlərində 30 qatar olub. Onlardan yalnız dördü tuneldə olub və sərnişinlərin təxliyəsi normativlərə uyğun olaraq ən qısa müddətdə uğurla həyata keçirilib. Hadisənin səbəbləri yaxın günlərdə ətraflı araşdırılacaq və ictimaiyyətə əlavə məlumat veriləcək. Hər hansı yanğın qeydə alınmayıb”.

TƏBİB-dən isə qeyd edilib ki, hadisə ilə əlaqədar çağırış ünvanına 21 təcili tibbi yardım briqadası cəlb olunub. Hadisə nəticəsində iki qadın – 25 həftəlik hamilə və sağ çiyin travması diaqnozu qoyulan 43 yaşlı şəxs Sabunçu Tibb Mərkəzinə hospitalizasiya edilib. Doqquz nəfərə isə arterial hipertenziya və stres reaksiyası səbəbi ilə yerində tibbi yardım göstərilib.