Ağdərədə iri enerji layihələri | Yeni su elektrik stansiyaları tikilir - Baku TV

“AzərEnerji” Ağdərə rayonunda irihəcmli enerji layihələri həyata keçirir. Tərtərçayın Ağdərədən keçən hissəsində ümumi gücü 15 meqavat olan “Çardaqlı-1” və “Çardaqlı-2” su elektrik stansiyaları tikilir. Layihə çərçivəsində suqəbuledicilər və maşın zalları inşa olunur, dağlıq ərazidə ümumi uzunluğu 11,4 kilometr olan derivasiya boruları çəkilir.

Bundan başqa, 10,4 meqavat gücündə “Həsənriz” Su Elektrik Stansiyası yenidən qurulur. Buradakı 110/35/10 kilovoltluq yarımstansiya da müasir rəqəmsal texnologiyalar əsasında tamamilə yenilənir.

Regionun enerji infrastrukturunun gücləndirilməsi üçün Kəlbəcərdən Ağdərəyədək 42 kilometr uzunluğunda, 110 kilovoltluq “Kəlbəcər–Həsənriz” ötürmə xətti də çəkilib. Xəttin Şuşa istiqamətindən gələn ötürmə xətti ilə birləşdirilməsi ilə bölgədə dairəvi enerji təchizatı sxemi yaradılıb.

Ağdərədə 14,7 meqavat gücündə “Qozlukörpü” Su Elektrik Stansiyası da artıq istifadəyə verilib. “AzərEnerji”nin məlumatına görə, həyata keçirilən layihələr Ağdərənin Qarabağda “yaşıl enerji” mərkəzinə çevrilməsinə və regionun enerji təhlükəsizliyinin gücləndirilməsinə xidmət edir.