“Aktyorsansa, ancaq yaşaya bilirsən” | Elşən Rüstəmov | “Başqa yolum yox idi, bunu etməli idim”

“Qapqara” verilişinin yeni buraxılışının qonağı Əməkdar artist, teatr və kino aktyoru Elşən Rüstəmov olub.

Sənətçi rollara olan münasibətindən və ekran işlərində qarşılaşdığı məqamlardan söz açıb:

“Aktyor öz təbiəti etibarilə rollara qarşı bir az acgöz olur. Bir ara elə filmlərimiz oldu ki, orada söyüş söyməli idim. Aktyor kimi hər şeyi bacarmalıyam. Dedim, yoxlayım, görüm, alınır, ya yox. Mənim üçün bir laboratoriya, sınaq meydanı kimi idi. Amma bir neçə filmdən sonra dərk etdim ki, yox, olmaz. Çünki söyüş söyən deyiləm və özümə qadağa qoydum ki, bu cür rollar olanda çəkilməyim”.

O, yaşlanmaqdan qorxmadığını və sənətdə hələ də ən böyük rolunu gözlədiyini vurğulayıb:

“Yaşlanmaqdan qorxmuram. Aktyor həmişə “partladacağı” rolu gözləyir. Hələ də o ümidlə bu sənətdəyəm. Ən böyük rolumu gözləyirəm, çünki xəyallar bitmir”.