AZAL 300 sərnişinin baqajını çatdırmağı unudub? | Qurumdan rəsmi açıqlama - Baku TV

Bloger Əlixan Rəcəbov bildirib ki, martın 23-də AZAL təyyarəsi ilə Moskvaya uçublar. Lakin aeroporta endikdən sonra 300-dən çox sərnişinin çamadanı gəlib çatmayıb.

Məsələ ilə bağlı Azərbaycan Hava Yollarından qeyd edilib ki, yaranmış qeyri-standart vəziyyətlə əlaqədar bəzi sərnişinlərin baqajı təyyarəyə yüklənməyib. Bu qərar yalnız uçuşun təhlükəsizliyini təmin etmək məqsədilə qəbul edilib:

“Rusiya hava məkanının müvəqqəti bağlanma ehtimalı nəzərə alınaraq əlavə yanacağın yüklənməsi tələb olunub və buna görə bir hissə baqaj təyyarəyə yüklənməyib. Uçuşun tamamilə dolu olması da nəzərə alınaraq təhlükəsizlik tədbirləri çərçivəsində müəyyən plandankənar qərarların qəbul olunması zəruri olub.

Qeyd edək ki, bu kimi hallarda təhlükəsizlik prioriteti əsas götürülərək baqajın sonrakı reyslə göndərilməsi beynəlxalq aviasiya təcrübəsində də tətbiq olunan standart əməliyyat yanaşmalarından biridir”.

AZAL-dan həmçinin bütün baqajların elə həmin gün axşam saatlarında təyinat məntəqəsinə çatdırılaraq sərnişinlərə təqdim olunduğu qeyd olunub.