Azərbaycan və Özbəkistan arasında media əməkdaşlığında yeni mərhələ - Baku TV

17-21 avqust 2026-cı il tarixlərində Özbəkistan Milli Teleradio Şirkətinin nümayəndə heyəti “Global Media Group”a daxil olan “Baku TV”də nəzəri və praktiki təlim proqramında iştirak edib. Səfərin əsas məqsədi “Baku TV”nin media istehsalı, rəqəmsal platformaların idarə edilməsi və məzmun strategiyası sahəsindəki təcrübəsini öyrənmək və tətbiq etmək olub.

Proqram çərçivəsində qonaqlar rəqəmsal platformaların strateji idarə olunması, media məzmununun istehsal prosesləri, süni intellekt texnologiyalarının tətbiqi, brendinq və vizual standartlar kimi mövzularda “Baku TV”nin mütəxəssisləri ilə görüşlər və konsultasiyalar keçiriblər.

Qeyd edək ki, “Baku TV” ilə Özbəkistanın “Özbəkistan 24” telekanalı arasında 2025-ci ilin oktyabrında Daşkənddə əməkdaşlıq memorandumu imzalanıb. Cari səfər həmin sənədlə nəzərdə tutulan təcrübə mübadiləsinin davamı kimi baş tutub.

Təlim proqramı iki qardaş ölkənin media sahəsindəki əlaqələrinin növbəti təzahürü olaraq təcrübə mübadiləsi əsasında qarşılıqlı faydalı əməkdaşlığın gücləndirilməsini nəzərdə tutur. “Baku TV”nin rəqəmsal platformalardakı uğurları və məzmun istehsalı təcrübəsi əsasında əldə edilən biliklərin təlim iştirakçılarının öz fəaliyyətlərində tətbiq olunması nəzərdə tutulur.

Xatırladaq ki, “Baku TV”nin Qazaxıstanın “Xabar” Agentliyi və Çinin “CCTV+” Agentliyi ilə də əməkdaşlıq memorandumları mövcuddur və beynəlxalq tərəfdaşlıq çərçivəsində işlər bundan sonra da davam etdiriləcək.

Təlim proqramının yekununda Özbəkistan Milli Teleradio Şirkətinin əməkdaşlarına “Baku TV” rəhbərliyi tərəfindən sertifikatlar təqdim olunub.