Azərbaycanda gündəmi zəbt edən hadisə | Valideynlər övladının həyatını təhlükəyə atdı

Dəmrov xəstəliyindən əziyyət çəkən azyaşlının xəstəxana əvəzinə molla yanına aparılması geniş müzakirələrə səbəb olub.

Müzakirənin əsas məğzi odur ki, valideyn uşağının dərdinə əlacı niyə dərmanda yox, duada görüb?

Məsələ ilə bağlı uşağı müayinə edən həkim Afət İbrahimli Baku TV-yə danışıb.

“Uşağı müayinə edən zaman bədənində ərəb hərfləri ilə yazılmış yazılara rast gəldim. Sözün düzü, əvvəlcə elə bildim ki, uşağın özü yazıb. Amma anası bildirdi ki, uşağı mollaya aparıb, ona dualar yazdırıblar. Anasının dediyinə görə, onun üzündə də yaralar var idi, duaların yazılması ilə sağalıb”, − deyə o bildirib.

Baku TV məsələyə din xadimlərinin münasibətini öyrənməyə çalışıb.

İlahiyyatçı Tural İrfan hesab edir ki, bu, mövhumatdan və xurafatdan başqa bir şey deyil:

“Doğrudur, “Qurani-Kərim”də buyurulur ki, “Quran” bəzi xəstəliklərə şəfadır, ancaq burada konkret olaraq tibbi xəstəliklərdən söhbət getmir. Çünki “Quran” tibbi kitab deyil. O yazıda da nədən bəhs olunduğunu oxumaq olmur. Bəlkə də, oxunmasın deyə qarışıq yazıblar və yaxud da mənasız bir şeydir. Ərəb hərflərinə oxşasa da, cümlə heç bir mənanı ifadə etmir”.

Həkimlər bildirirlər ki, vaxtında müdaxilə olunmasa, sadə bir dəmrov xəstəliyi belə inkişafda ləngiməyə və sağlamlıqda ciddi problemlərə gətirib çıxara bilər. Mollaların və tibb sahəsinə yad digər şəxslərin müdaxiləsi sadəcə vaxt itkisinə və riskin artmasına səbəb olur.