Azərbaycanda ilk dəfə balıqtutma üzrə çempionat keçirilir - Baku TV

Gənclər və İdman Nazirliyi, Azərbaycan Su İdman Növləri Federasiyası və "Bakı Balıqçılar və Sualtı Ovçular Klubu"nun birgə təşkilatçılığı ilə ölkəmizdə ilk dəfə karpfişinq (balıqtutma) üzrə Azərbaycan çempionatına start verilib.

Şamaxı rayonunun Çuxuryurd kəndində yerləşən eyniadlı göldə təşkil olunan yarışda 3 klubdan 30-dək idmançı mübarizə aparır. Karpfişinq qaydalarına əsasən, iştirakçılar sazan balıqlarını tutduqdan sonra çəkisini müəyyən edib yenidən suya buraxırlar.

"Bakı Balıqçılar və Sualtı Ovçular Klubu"nun İdarə Heyətinin rəsmisi Azər Əliyev yarışın əhəmiyyəti və qaydaları haqqında məlumat verib:

"Ümumilikdə 30-a yaxın idmançının qatıldığı yarış 48 saat davam edəcək və yekunda Azərbaycan çempionu müəyyənləşəcək. Əsas məqsədimiz ölkəmizdə idman və mədəni balıqçılığı inkişaf etdirmək, akvakulturaya və ekosistemə dəstək olmaqdır. Karpfişinqin ana prinsipi tutulan balığa minimum zərər vuraraq onu təbiətə qaytarmaqdır və biz bu prinsiplərə tam sadiqik".