Azərbaycanda kimlər ödənişsiz təhsil alacaq? | Elm və Təhsil Nazirliyindən açıqlama

Ali təhsil müəssisələrinə ödənişli əsaslarla qəbul olan bəzi şəxslər təhsil haqqından azad ediləcək. Bu barədə Elm və Təhsil Nazirliyi məlumat paylaşıb.

Dövlət, bələdiyyə və özəl ali təhsil müəssisələrində təhsil alan valideynlərini itirmiş və valideyn himayəsindən məhrum olmuş uşaqlar, şəhid ailəsinin üzvləri, Azərbaycanın ərazi bütövlüyünün, müstəqilliyinin və Konstitusiya quruluşunun müdafiəsi ilə əlaqədar əlilliyi müəyyən edilmiş və ölkəmizin azadlığı, suverenliyi və ərazi bütövlüyü uğrunda həlak olan, hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların uşaqları, ölkəmizin ərazi bütövlüyü uğrunda döyüş əməliyyatlarında iştirak etdiyinə görə “Müharibə veteranı” adı almış şəxslər, orqanizmin funksiyalarının 61-100 faiz pozulmasına görə, habelə 18 yaşınadək əlilliyi müəyyən edilmiş şəxslər təhsil haqqından azad edilib.

Dövlət ali təhsil müəssisələrində təhsil alan məcburi köçkün statusuna malik Azərbaycan vətəndaşlarının da təhsil haqqı dövlət hesabına ödəniləcək.

Qeyd edək ki, Ali təhsil müəssisələrinə tələbə qəbulu müsabiqəsinin nəticələrinə əsasən, 2024–2025-ci tədris ili üçün 55 656 nəfər universitetlərə qəbul olunub. Onlardan 27 117 nəfəri dövlət sifarişi əsasında, 28 539-u isə ödənişli əsaslarla təhsil almaq hüququ əldə edib.