Bakıdakı zəlzələdən sonra həyət evlərinin qiyməti qalxacaq?
Gecə saatlarında baş verən zəlzələ həyət evlərinin təhlükəsizlik baxımından çoxmərtəbəli binalardan üstünlüyü məsələsini yenidən gündəmə gətirib.
Yeraltı təkanların xüsusilə hündür yaşayış binalarında təlaş yaratması, həyət evlərində isə demək olar ki, hiss edilməməsi bu evlərin daha etibarlı olması fikrini artırıb.
Bu baxımdan mütəxəssislər düşünürlər ki, zəlzələdən sonra fərdi yaşayış evlərinə olan tələbat artacaq. Fərdi evlərə marağın artacağı təqdirdə, təbii ki, onların qiymətinin yüksəlməsi də qaçılmazdır.
“Zəlzələ vahiməsi uzun müddət davam etsə, həyət evlərinə marağın artmasını və bununla əlaqədar olaraq qiymətlərin yüksəlməsini müşahidə edə bilərik. Lakin burada söhbət süni qiymətdən getmir. Bunlar normal bazar prosesləridir. Süni qiymət monopolistlərin təyin etdiyi qiymətdir”, – deyə əmlak eksperti Xalid Kərimli qeyd edib.
Xatırladaq ki, fevral ayında qardaş ölkə Türkiyədə baş verən zəlzələ zamanı da ölkəmizdə həyət evlərinə olan tələbat artmış və süni bahalaşma baş vermişdi. Ancaq bu hal uzun çəkmədi. Qiymət artımı prosesinin bu dəfə nə qədər davam edəcəyini isə zaman göstərəcək.
![icon](/images/loading.png)