Baku TV-nin işıqlandırdığı problem həllini tapdı | Stomatoloji klinika cəzalandırıldı

Bir müddət əvvəl Baku TV-də qaynar xəttə daxil olan şikayət əsasında “L.A. Dent” stomatoloji klinikasında sertifikatsız fəaliyyət göstərən Turab Məmmədli barədə süjet yayımlanıb.

Həmçinin Turab Məmmədlinin stomatoloq kimi fəaliyyət göstərməsi üçün tələb olunan tibbi ixtisas diplomlarının olub-olmaması barədə Səhiyyyə Nazirliyinin Analitik Ekspertiza Mərkəzinə rəsmi şəkildə müraciət də ünvanlanıb.

Dövlət qurumunun uzun araşdırmalardan sonra rəsmi cavabı belə olub:

“Media vasitəsilə edilən müraciətlərlə əlaqədar “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Azərbaycan Respublikasının Qanununa müvafiq olaraq, Bakı şəhəri, Nərimanov rayonu, Kaveroçkin küçəsi, ev 27 ünvanında yerləşən “L.A. Dent Diş Klinikası” MMC-yə məxsus özəl tibb müəssisəsində əməkdaşlarımız tərəfindən plandankənar yoxlama keçirilib.

Yoxlama zamanı Turab Məmmədlinin əmək müqaviləsi üzrə diş texniki vəzifəsinə götürülməsi və sertifikatsız tibb fəaliyyəti ilə əlaqədar “L.A. Dent Diş Klinikası” MMC barədə inzibati tənbeh tədbiri seçilərək İnzibati Xətalar Məcəlləsinin 215.1 – lisenziyadan kənar fəaliyyəti və 215.4-cü – sertifikasiyadan keçməyən şəxsin praktik tibbi fəaliyyətə buraxılması maddələri üzrə inzibati xəta haqqında protokol tərtib edilib”.