Bu əlamətlər varsa, müayinə olun, yoxsa... | Ən təhlükəli onkoloji xəstəlik

Kolorektal xərçəng ən geniş yayılan və təhlükəli onkoloji xəstəliklərdən biridir. Müasir müalicə üsullarının inkişafına baxmayaraq, xəstəlik gec aşkar edildikdə 5 illik sağ qalma ehtimalı 40%-dən aşağı olur.

Rusiyalı onkoloq, tibb elmləri namizədi Dmitri Belkovun sözlərinə görə, yaş artdıqca kolorektal xərçəngin yaranma riski artır. Üstəlik, kişilər bu xəstəliyə qadınlardan daha çox meyillidirlər. Genetik faktorlar şişin yaranma riskini 3-5 dəfə artırır. Bundan başqa, xəstəliyin təxminən 50%-i həyat tərzi və kanserogen maddələrlə uzunmüddətli təmasla əlaqəlidir.

Həkimin fikrincə, bu xəstəlik yavaş inkişaf etdiyi üçün uzun müddət simptomlar üzə çıxmaya bilər. Belkov qeyd edib ki, bağırsağın sağ tərəfində yerləşən şişlər əsasən xroniki yorğunluq və halsızlıq, anemiya, çəki itkisi, periodik qızdırma kimi simptomlarla özünü büruzə verir.

Bağırsağın sol tərəfində yerləşən şişlər isə qəbizlik və ya ishal, qarnın ağrısı və köp, bağırsaq keçilməzliyi, nəcisdə qan və irin qarışıqları, defekasiya zamanı kəskin ağrılar kimi əlamətlərlə özünü göstərir.

Onkoloq Belkov bağırsaq xərçəngindən qorunmağın ən effektiv yolunun müntəzəm kolonoskopiya olduğunu vurğulayıb.