“Cərimələnirəmsə, problem yoxdur” | Nasaz avtomobil sürücüləri ilə bağlı reyd

Parlament prospekti və Mikayıl Müşfiq küçələrinin kəsişməsində “Təmiz hava” aylığı çərçivəsində reyd keçirilib.

Reyd zamanı Daxili İşlər Nazirliyi ilə Ekologiya və Təbii Sərvətlər Nazirliyinin əməkdaşları tərəfindən nəqliyyat vasitələrinin havaya buraxdığı zərərli tullantıların norması və texniki vəziyyəti yoxlanılıb.

Aparılan yoxlamalar zamanı nəqliyyat vasitələrinin mühərrikindən atmosferə normadan artıq dəm qazı buraxıldığı müəyyən edilib. Avtomobillərində bu hal qeydə alınan sürücülər onlara verilən tövsiyələrə əməl edəcəklərini bildiriblər.

“Hər dəfə maşınımı ustaya aparıram, problem çıxmadığına görə qeydiyyatdan keçirirəm. Bu dəfə nasazlıq yarandı, təkrar ustaya aparacağam”, – sürücülərdən biri söyləyib.

Bakı Şəhər Dövlət Yol Polisi İdarəsinin bölmə rəisi Toğrul Nəsirli jurnalistlərə açıqlamasında bildirib ki, mütəxəssislərin iştirakı ilə sürücülərlə maarifləndirici söhbətlər aparılıb:

“Lakin həyata keçirilən təbliğat və təşviqat işlərinin intensivliyinə baxmayaraq, avtomobil yollarında mühərriki nasaz olan nəqliyyat vasitələri var. Bütün bunları nəzərə alaraq bir daha sürücülərdən istifadələrində olan avtomobilləri saz vəziyyətdə istismar etmələrini xahiş edirik”.