Dahi bəstəkarın anadan olmasının 140-cı ildönümü qeyd olunub

18 sentyabr Milli Musiqi Günüdür.

1885-ci il sentyabrın 18-də dahi bəstəkar Üzeyir Hacıbəyli anadan olub. Məhz bu gün onun adı ilə bağlıdır.

Üzeyir bəy milli musiqimizin banisi kimi şöhrət qazansa da, onun publisist, dramaturq, jurnalist, pedaqoq, tərcüməçi olaraq xidmətləri də ən azı bəstəkarlıq bacarığı qədər çox dəyərli və əvəzsizdir.

Dahi Üzeyir Azərbaycan musiqi sənətinin banisi olmaqla yanaşı, milli mətbuatımızın təşəkkül tapmasında, inkişafında xüsusi xidmətləri olan böyük şəxsiyyətlərdən biridir. Azərbaycan mətbuatını Üzeyir Hacıbəylisiz təsəvvür etmək qeyri-mümkündür.

Üzeyir Hacıbəylinin ən böyük xidmətlərindən biri müstəqil Azərbaycanın ilk himnini yaratmasıdır. Dahi bəstəkarın yazdığı hər bir əsər, hər bir not vərəqi bizim üçün qiymətlidir. Üzeyir şəxsiyyəti isə Azərbaycan xalqının iftixarı, milli kimliyimizin ən gözəl göstəricilərindən biridir.

Şərqdə ilk operanın müəllifi kimi tanınan Üzeyir Hacıbəylinin anadan olmasının 140-cı ildönümü qeyd olunur. 2025-ci il fevralın 3-də Prezident İlham Əliyev Üzeyir Hacıbəylinin anadan olmasının 140 illiyi münasibətilə Sərəncam imzalayıb.

Görkəmli bəstəkarın anadan olduğu gün həm də Üzeyir Hacıbəyli Beynəlxalq Musiqi Festivalının açılışı ilə əlamətdardır.

Bu il festival 17-ci dəfə zəngin proqramla musiqisevərlərin görüşünə gəlib. Heydər Əliyev Fondunun və Mədəniyyət Nazirliyinin təşkilatçılığı, Türk Mədəniyyəti və İrsi Fondu, eləcə də ICESCO-nun dəstəyi ilə təşkil olunan festival sentyabrın 28-dək davam edəcək. 10 gün keçirilən musiqi bayramı çərçivəsində Bakı, Sumqayıt, Naxçıvan, Gəncə, Ağcabədi, Qazax, Şuşada müxtəlif konsert proqramları sərgilər, tamaşalar, elmi simpozium və ustad dərsləri təşkil olunacaq.

Festivalda ölkəmizlə yanaşı, Türkiyə, ABŞ, Almaniya, Fransa, İsveçrə, Cənubi Koreya və digər ölkələrdən olan tanınmış ifaçılar və musiqişünaslar da çıxış edəcəklər.

Bu isə bir daha onu göstərir ki, Üzeyir Hacıbəyli zirvəsi bütün zamanlarda əlçatmaz və əvəzedilməzdir.