DİN-dən xəbərdarlıq | Hansı məlumatları hamıdan gizlətməliyik?

Şəxsiyyət vəsiqəsinin surəti vətəndaşa bir çox məqamda lazım olur. İstər mənzil kirayələyərkən, istərsə də hotel və bu kimi yerlərdə bəzən vəsiqənin surəti ilə yanaşı, nikah haqqında şəhadətnamə belə tələb olunur. Başqa sözlə, vətəndaşın şəxsi məlumatlarını tanımadığı insanlar əldə etmiş olur.

Bəziləri bunu adi hal kimi qəbul etsə də, əksəriyyət bu vəziyyətə qarşıdır. Bəs şəxsiyyət vəsiqəsindən sui-istifadə halları olmayacağına kim zəmanət verir?

Məsələ ilə bağlı Daxili İşlər Nazirliyi vətəndaşlara xəbərdarlıq edib.

“Öz şəxsi məlumatınızı – şəxsiyyət vəsiqəsi, eləcə də bank kartı məlumatlarınızı tanımadığınız şəxslərə, etibar etmədiyiniz şirkətlərə verməyin. Belə olan halda, neqativ əməllə rastlaşarsınızsa, dərhal bu barədə DİN-in “102” xidməti-zəng mərkəzi, eləcə də DİN-in “Polis Azərbaycan” “Instagram” və “Facebook” səhifələrinə müraciət edə bilərsiniz. Hər bir müraciət həssaslıqla araşdırılmaqla əmələ hüquqi qiymət verilməsi üçün tədbirlərin görülməsi diqqət mərkəzində saxlanılacaq”, – deyə DİN-dən bildirilib.