Dövlət qurumlarının adından dələduzluq: Kart məlumatlarınızı bu yolla oğurlayırlar

Son bir ayda kiberdələduzluq hallarında ciddi artım var.

Bu barədə Xüsusi Rabitə və İnformasiya Təhlükəsizliyi Dövlət Xidmətindən məlumat verilib. Bildirilib ki, kommunal xidmətlərin və ya cərimələrin xüsusi endirimlər və bonuslarla ödənilməsi üçün “asan ödəmə.info”, “asan cərimə.net”, “asan cərimə.biz” və “asan cərimə.com” adlı saxta saytlar yaradılıb.

Sosial şəbəkələr vasitəsilə reklam olunaraq vətəndaşların marağını cəlb edən bu saytlar onları aldatmaqla yanaşı, saxta ödəniş səhifələrinə yönləndirir və kart məlumatlarını ələ keçirir. Belə kiberdələduzluq halları araşdırılmaqla ölkə üzrə bloklanır.

Xüsusi Rabitə və İnformasiya Təhlükəsizliyi Dövlət Xidməti vətəndaşlara reklam olunan kampaniyalara qarşı həssas davranmağı, alınan məlumatları dəqiqləşdirməyi və yalnız rəsmi səhifələrə etibar etməyi tövsiyə edir.