Əməkdar artist Elza Qaybalıyeva Baku TV-yə nələri açıqladı?

Əməkdar artist, xanəndə Elza Qaybalıyeva hazırda işsizdir və çox ciddi sağlamlıq problemləri ilə mübarizə aparır.

Ömrünün böyük bir hissəsini Azərbaycan mədəniyyətinin inkişafına həsr edən Elza Qaybalıyeva Mədəniyyət Nazirliyindən dəstək və qayğı görə bilmədiyi üçün şikayətçidir.

Muğam ifaçısı deyir ki, mövcud durumu ilə bağlı dəfələrlə Nazirliyin qapısını döysə də, onunla maraqlanan olmayıb. Həmçinin 63 yaşlı sənətkarın işlə təmin olunması üçün onun imtahan verməli olduğu bildirilib.

“Mədəniyyət nazirinin qəbuluna gedəndə məni içəri buraxmadılar. “İmtahan verməlisiniz, sonra nəticələrinizə uyğun olaraq sizi hara göndərəcəyimizə baxarıq” dedilər. Mən çox pərişan oldum. İllərin sənətkarıyam, ömrümü bu sahəyə həsr etmişəm”, – deyə Elza Qaybalıyeva bildirib.

Məsələ ilə bağlı Mədəniyyət Nazirliyinin Media və Kommunikasiya şöbəsinin müdiri Aynur Kərimova bildirib ki, Bakı şəhərində fəaliyyət göstərən bütün teatr, konsert müəssisələri, həmçinin musiqi kollektivlərinin kadrlarının işə qəbuluna bədii şuralarda baxılır:

“Bədii Şura hər müəssisənin özündə fəaliyyət göstərir. Şura tərəfindən namizədlərin mədəniyyət sahəsində əldə olunmuş uğurları, fəaliyyəti nəzərə alınır və bununla əlaqədar müəssisə və kollektivlərin rəhbərliyinə birbaşa müraciət edilməlidir”.