Ermənistanın Gəncədə törətdiyi dördüncü terrordan altı il ötür - Baku TV

44 günlük Vətən müharibəsi zamanı Gəncəyə edilən dördüncü raket hücumu ən ağır faciələrdən biri kimi yadda qaldı. Ermənistan ərazisindən gecə saat 2 radələrində dinc sakinlərin yaşadığı əraziyə atılan ballistik raket nəticəsində 10 mülki şəxs həlak oldu, 50-yə yaxın insan yaralandı.

Raket hücumu bir neçə ailənin həyatını alt-üst etdi. Bəzi ailələrin bütün üzvləri faciənin qurbanı oldu. Üç uşaq hər iki valideynini, bir azyaşlı isə ailəsinin bütün üzvlərini itirdi.

Şəhid anası Sevil Babazadə həmin gecənin dəhşətlərini və faciənin uşaqların həyatında buraxdığı ağır izləri belə xatırlayır:

“O hadisə yaddaşımızda elə dəhşətli bir xatirə kimi qalıb ki, onu silmək mümkün deyil. Həmin hadisə haqqında danışanda elə hiss edirəm ki, sanki indicə baş verib. Dağıntılar hələ də gözümün qabağındadır. Ən çox əziyyət çəkən, ən çox itki verən Nilay oldu. Nilay bir gecədə atasını, anasını, nənəsini – üç doğma insanını itirdi. Müharibə zamanı mülki əhalinin əzab çəkməsi cinayətdir”.

Raket hücumunda atasını itirən Yusif Bağırov da həmin gün yaşadıqlarını unuda bilmir:

“Gəncəyə çatanda atamın şəhid olduğunu öyrəndim. Anam isə xəsarət almışdı. Hər il həmin hissləri yaşayırıq. İldönümü gəldikcə o anları yenidən xatırlayırıq”.