Estetik əməliyyat qalmaqalı | “UĞUR-777” estetik mərkəzi ilə bağlı şok istintaq detalları - Baku TV

Son günlər hazırda fəaliyyəti dayandırılmış "UĞUR-777" estetik mərkəzinin adı yenidən qalmaqallı iddialarda hallanır.

Belə ki, sosial şəbəkələrdə yayılan məlumata görə, burada bir qadına qeyri-tibbi şəraitdə liposaksiya əməliyyatı həyata keçirilib.

Əldə olunan məlumatlara görə, əməliyyat heç bir ilkin tibbi müayinə aparılmadan icra edilib.

Şikayətçi bildirib ki, əməliyyat zamanı ayılıb, lakin ona yenidən anesteziya verilməyib. Daha sonra isə güclü ağrılar içərisində evə göndərilib.

Pasiyentin iddiasına əsasən, sonrakı dövrdə onun vəziyyəti ilə maraqlanan olmayıb və həkimlə də əlaqə saxlaya bilməyib.

Məlumata görə, əməliyyatı Gülbadə Abdullayeva həyata keçirib.

Qeyd edək ki, bu onun adı hallanan ilk qalmaqal deyil.

Mövcud vəziyyətlə bağlı Səhiyyə Nazirliyindən bildirilib ki, sosial mediada yayılan məlumatlardan da bəlli olur ki, sözügedən görüntülər köhnədir və əməliyyat 2025-ci ilin fevral ayında "UĞUR Estetik Mərkəzi 777" adı altında qeyri-qanuni fəaliyyət göstərən mərkəzdə baş tutub.

Qeyd edək ki, "UĞUR Estetik Mərkəzi 777" adı altında lisenziyasız özəl tibb fəaliyyəti göstərən obyektlə əlaqədar Analitik Ekspertiza Mərkəzinə vətəndaşlardan daxil olmuş şikayətlər əsasında qanunvericiliyin tələblərinə uyğun olaraq bir neçə dəfə plandankənar yoxlamalar keçirilib. Sonuncu dəfə 22 iyul 2025-ci il tarixində növbəti plandankənar yoxlama keçirilib. Obyektin lisenziya olmadan özəl tibb fəaliyyəti göstərdiyi müəyyən edilib.

Gülbadə Abdullayevaya gəlincə isə aparılmış araşdırmalar nəticəsində müəyyən edilib ki, onun ali və ya orta tibb təhsili yoxdur və uyğun olaraq da Vahid Səhiyyə İnformasiya Sistemində tibb işçisi kimi qeydiyyatda deyil. Həm "UĞUR Estetik Mərkəzi 777", həm də cari ilin may ayında fərdi sahibkar Abdullayeva Gülbadə Əliqismət qızı, eləcə də onunla əməkdaşlıq edən şəxs barəsində Analitik Ekspertiza Mərkəzi tərəfindən qanunvericiliyə uyğun inzibati tədbirlər görülüb.

Bundan əlavə, xidməti araşdırmanın nəticələrinə əsasən, fərdi sahibkar Abdullayeva Gülbadə Əliqismət qızının qanunsuz özəl tibb fəaliyyətinin dayandırılması məqsədilə hüquq-mühafizə orqanları qarşısında müvafiq vəsatətin qaldırılması məqsədilə təqdimat yazılaraq növbəti icraata göndərilib.

Məsələ ilə bağlı müvafiq tədbirlərin görülməsi üçün Səhiyyə Nazirliyi tərəfindən prokurorluq orqanlarına müraciət edilib.