Fermada yaşayan 4 uşaq anası imdad diləyir | "Ərimi bu vəziyyətdə qoyub necə işləyim?!" - Baku TV

Dörd övladı olan Həsənovlar ailəsi üzləşdikləri ağır sosial vəziyyətlə bağlı Baku TV-yə müraciət edib.

Ailə üzvü Nərminə Həsənovanın sözlərinə görə, həyat yoldaşı Həsən Həsənov Vətən müharibəsində iştirak edib və müharibədən sonra səhhətində yaranan problemlərlə əlaqədar bir neçə dəfə müalicə alıb. Ailə dolanışıq məqsədilə Şəkinin Cumakənd ərazisindən Zaqatala rayonunun Lahıc kəndində yerləşən fermaya köçüb.

Nərminə Həsənova bildirib ki, maddi imkansızlıq səbəbindən uşaqlarını məktəbə göndərə bilmir:

“İmkansızlıqdan bu fermaya köçmüşəm. Uşaqlarımı məktəbə göndərə bilmirəm. Hər ana kimi mən də istəyirəm ki, övladlarım təhsil alsın. Yoldaşım müharibəyə getməmişdən əvvəl ailəni dolandıra bilirdi. Amma indi vəziyyətimiz çox ağırdır. Uşaqlarımı yedizdirməyə heç nə tapmıram. Mən və yoldaşım işləyə bilmirik. Körpə uşaqlarımı və xəstə ərimi qoyub harada işləyim?!”.

Məsələ ilə bağlı Dövlət Sosial Müdafiə Fondundan bildirilib ki, Zaqatala rayon sakini Həsənova Nərminə Elman qızı ilə ailənin ünvanlı dövlət sosial yardımı hüququnun müəyyən edilməsi məqsədilə ilkin olaraq telefon vasitəsilə əlaqə saxlanılıb.

Qeyd olunub ki, aparılan danışıq zamanı ailənin sosial yardımla bağlı elektron sistemə son müraciətinin 2023-cü ildə edildiyi məlum olub. Həmin müraciət zamanı ərizə-bəyannamədə göstərilən ünvanda ailənin faktiki yaşamaması səbəbindən imtina verilib. Bundan sonra ailə tərəfindən elektron sistem üzərindən yeni müraciət daxil olmayıb.

Hazırda ailə tərkibi 6 nəfərdən ibarətdir. Nərminə Həsənova 8 yaşınadək uşağa qulluq edən şəxs, həyat yoldaşı isə əmək qabiliyyətli, lakin məşğulluğu olmayan şəxs kimi qeydiyyatdadır. Bu səbəbdən mövcud qanunvericiliyə əsasən, ailənin hazırda ünvanlı dövlət sosial yardım almaq hüququ yaranmır.