Gənc jurnalistlər enerji sahəsində ətraflı məlumatlandırıldı - Baku TV

Enerji Dialoqu Platforması çərçivəsində SOCAR-ın və Medianın İnkişafı Agentliyinin birgə təşkilatçılığı ilə gənc media nümayəndələri üçün keçirilən silsilə məlumatlandırma sessiyaları başa çatıb.

“Qlobal enerji bazarlarında yeni çağırışlar: etibarlı tərəfdaşlıq və Azərbaycanın strateji rolu” mövzusunda keçirilən layihənin bağlanış mərasimi olub.

Medianın İnkişafı Agentliyinin icraçı direktoru Əhməd İsmayılovun və SOCAR-ın Kommunikasiya məsələləri üzrə icraçı direktoru Aygün Hüseynovanın iştirakı ilə təşkil olunan mərasimdə layihə çərçivəsində gənc jurnalistlərin Azərbaycanın enerji strategiyası, SOCAR-ın çoxşaxəli fəaliyyəti, eləcə də dünya enerji bazarlarında baş verən proseslər barədə dolğun məlumat əldə etdikləri vurğulanıb.

Bu xüsusda proqramın enerji sahəsi üzrə ixtisaslaşan gənc media nümayəndələrinin məlumatlılığının daha da artırılması baxımından önəmi qeyd olunub.

Sonra silsilə məlumatlandırma sessiyalarında iştirak edən gənc media nümayəndələrinə sertifikatlar təqdim olunub.