Həbs olunduğu deyilən Tofiq Musayevdən Baku TV-yə açıqlama

Dünyaca məşhur MMA döyüşçümüz Tofiq Musayev onunla birlikdə daha 3 idmançının, eləcə də məşqçilərinin xuliqanlıq hərəkətlərinə görə polis əməkdaşları tərəfindən saxlanılaraq məsuliyyətə cəlb edilməsi ilə bağlı xəbərlərə münasibət bildirib.

O, bu barədə Baku TV-yə açıqlama verib.

“Yayılan xəbərlər boş-boş şeylərdir. Ölkənin bayrağını ucaldan, müharibədə can qoyan idmançılara hörmət etsinlər. Biz bu millət üçün canımızdan, qanımızdan keçmişik. Bunlar, deyəsən, bizi ləkələmək istəyirlər”, – deyə tanınmış idmançı bildirib.

Qeyd edək ki, məşqçi Ruslan Əfəndiyevlə yanaşı, tələbələri Tofiq Musayev, Xəzər Rüstəmov, Vüqar Kərəmov, Mehman Məmmədov və Rüfət Əsədovun ictimai yerdə vətəndaşa zor tətbiq edərək xuliqanlıq hərəkətləri törətməkdə ittiham olunduqları barədə məlumat yayılmışdı.