Hipokampda 2 dəfədən çox yeni neyron əmələ gəlir

Geniş yayılmış fikrə görə, yaddaş və yeni məlumatları mənimsəmə qabiliyyəti yaş artdıqca tədricən zəifləyir.

Bu proses artıq 30 yaşında başlayır, həmin vaxt beyin tam yetkinliyə çatır. Bundan sonra idrak funksiyaları əvvəlcə yavaş, sonra isə getdikcə sürətlə zəifləməyə başlayır.

Lakin bəzi insanlar hətta 80-90 yaşlarında olduqca iti yaddaşını qoruyub saxlayırlar. Alimlər onları “superuzunömürlülər” adlandırırlar. Bunun səbəbi beyində yeni sinir hüceyrələrinin aktiv şəkildə əmələ gəlməsi ola bilər.

Tədqiqatın nəticələri göstərib ki, həmin şəxslərdə hipokampda – beyinin yaddaşa cavabdeh olan hissəsində digər yaşlı insanlara nisbətən təxminən iki dəfə çox yeni neyron əmələ gəlir. Bu proses demensiyanın erkən əlamətləri olan insanlarda xeyli zəifdir, Altsheymer xəstəliyi olanlarda isə demək olar ki, yoxdur.

Qocalma üzrə isveçli tədqiqatçı, professor İnqmar Skuqun sözlərinə görə, bu kəşf beyinin qocalması ilə bağlı mövcud təsəvvürü dəyişdirə bilər. Əvvəllər belə hesab edilirdi ki, idrak geriləməsi əsasən sinir hüceyrələrinin tədricən itirilməsi ilə əlaqəlidir. Yeni məlumatlar göstərir ki, yeni neyronların əmələ gəlməsi də əhəmiyyətli rol oynaya bilər.