İqlim dəyişikliyi Azərbaycanda nələrə səbəb oldu? | Təhlükə xəbərdarlığı

“Dünya fəsillərin yerinin dəyişməsi, ekstremal hava hadisələri ilə üzləşməkdədir”.

Bunu Bakı İqlim Fəaliyyəti Həftəsinin (BİFH) açılış günü çərçivəsində “İqlim İmperativi: yerli fəaliyyətdən qlobal fəaliyyətə” panelində çıxışı zamanı ekologiya və təbii sərvətlər nazirinin müavini Umayra Tağıyeva deyib.

O bildirib ki, buna görə dünya uzlaşma həlləri üçün birlikdə tədbirlər görməlidir:

“Uğurlu uyğunlaşma yalnız hökumətlərdən asılı deyil. Burada hər kəsin davamlı iştirakı, biliklərin səmərəli idarə edilməsi tələb olunur. Paris Sazişi çərçivəsində “Qlobal Uyğunlaşma” adlı qurum yaradıldı. Temperaturun 1,5-dən yuxarı qalxması risklər yaradır. Dünya təhlükəli həddə doğru irəliləyir. Temperaturu 1,5-dən aşağı salmaq üçün tədbir görmək imkanları azalır”.

U.Tağıyeva bildirib ki, ölkəmiz unikal ölkədir. İqlim dəyişikliyi nəticəsində ölkəmizdə də meşə yanğınları, su ehtiyatlarının azalması, buzlaqların əriməsi kimi problemlər özünü göstərir:

“Son 10 ildə yağıntıların ciddi surətdə azalması kənd təsərrüfatına da təsir göstərib. Ölkəmizdə iqlim dəyişikliklərinin təzahürləri müşahidə edilir. Biz misli görülməmiş sayda – 147 daşqınla üzləşdik. Bu il isə hələ payız olmasına baxmayaraq, daşqınların sayı 102-ni keçib. Ölkənin 3-cü “Qırmızı Kitab”ının həcmi artıb. Çünki ölkədə təhlükədə olan flora və faunanın sayı artmaqdadır”, – deyə o əlavə edib.