İşdən çıxanların üzünü güldürəcək xəbər | Kimlərə kompensasiya veriləcək? - Baku TV

Artıq istifadə olunmayan məzuniyyət günləri boşa getməyəcək. İşdən çıxan şəxslərə həmin günlərə görə kompensasiya ödəniləcək. Bu, Azərbaycan Konstitusiya Məhkəməsinin əmək qanunvericiliyində işçilərin hüquqlarına dair qəbul etdiyi qərarda əksini tapıb.

Vəkil Qasım Şaliyev bildirib ki, indiyədək işçi rəhbərliyin tapşırığı və ya iş zərurəti səbəbindən əsas və əlavə əmək məzuniyyətindən istifadə etmədikdə işdən azad olunarkən Əmək Məcəlləsinin müvafiq maddəsi əsas götürülərək yalnız əsas əmək məzuniyyətinə görə kompensasiya ödənilirdi.

Onun sözlərinə görə, Konstitusiya Məhkəməsinin son qərarı işçilərin hüquqlarının daha effektiv qorunmasına xidmət edir:

“Yeni yanaşmaya əsasən, əmək müqaviləsinə xitam verilərkən işçiyə təkcə əsas əmək məzuniyyətinə görə deyil, qanunla nəzərdə tutulan əlavə məzuniyyət günlərinə görə də kompensasiya ödənilməlidir”.

Millət vəkili Vüqar Bayramov da bildirib ki, qərara əsasən, vətəndaş işlədiyi müddətdə məzuniyyətdən tam istifadə etməyibsə, əmək müqaviləsinə xitam verilərkən istifadə olunmamış bütün məzuniyyət günlərinə görə ödəniş alacaq.

“Əgər vətəndaşın illik 21 gün məzuniyyət hüququ varsa və o bunun bir hissəsini, məsələn, 10 gününü istifadə etməyibsə, illər ərzində yığılan istifadə olunmamış məzuniyyət günlərinin sayı 50 günə çatdıqda işdən ayrılarkən həmin 50 gün üçün məzuniyyət haqqı hesablanaraq kompensasiya şəklində ödəniləcək”, – deyə o qeyd edib.

Mütəxəssislər vətəndaşlara tövsiyə edirlər ki, əmək müqaviləsinə xitam verilərkən istifadə olunmamış məzuniyyət günlərinə görə kompensasiyanın ödənilib-ödənilmədiyini mütləq dəqiqləşdirsinlər.

Qeyd edək ki, ölkədə minimum illik əsas məzuniyyət 21 təqvim günüdür. Bəzi peşə sahələrində isə bu müddət daha uzun ola bilər.