İsmayıllıda təhsil işçiləri bir araya gəldi

İsmayıllıda Azərbaycan Təhsil İşçiləri Azad Həmkarlar İttifaqı Komitəsinin növbəti konfransı keçirilib.

Konfransda İsmayıllı Rayon İcra Hakimiyyətinin başçısı Nahid Bağırov, Azərbaycan Təhsil İşçiləri Azad Həmkarlar İttifaqı Komitəsinin Təşkilat şöbəsinin müdiri Emil Rüstəmov, İttifaqın İsmayıllı Komitəsinin sədri Hafiz Kərimov və Komitə fəalları iştirak edib.

Konfransda son 5 ildə komitə tərəfindən görülən işlər müzakirə edilib, hesabat məruzələri və çıxışlar dinlənilib. İsmayıllı Rayon İcra Hakimiyyətinin başçısı Nahid Bağırov komitənin gördüyü işlərdən danışıb.

Sonra təhsil işçilərinin gündəmdə olan sosial-iqtisadi məsələləri konfrans iştirakçılarının diqqətinə çatdırılıb və onların həlli ilə bağlı aidiyyəti qurumlara və orqanlara xahiş və tələblər ünvanlanıb.

Xüsusi olaraq, şəhid ailələrindən olan təhsil işçilərinin, qazilərin diqqətdə saxlanılması yerli həmkarlar ittifaqı sədrlərinə tapşırılıb. Gənc təhsil işçilərinin məişət problemlərinin həllinə qayğının artırılması ilə bağlı RİH və bələdiyyə orqanlarının köməyinə ehtiyac olduğu nəzərə çatdırılıb.

Azərbaycan Təhsil İşçiləri Azad Həmkarlar İttifaqı İsmayıllı komitəsinin sədri Hafiz Kərimovun növbəti dəfə sədr seçilməsi həmkarlar ittifaqı fəalları tərəfindən yekdilliklə qəbul edilib.

Sonda İsmayıllı Rayon Həmkarlar İttifaqı tərəfindən fəallar Fəxri fərman, diplom və medallarla təltif ediliblər.