“Kəsməmişdən əvvəl mütləq...” | Qarpızı soyuducuda nə qədər saxlamaq olar?

Yay aylarının sevilən giləmeyvələrindən biri də qarpızdır.

Qarpız həzm prosesini rahatlaşdırır, həmçinin susuzluğu aradan qaldırır. Hər nə qədər qarpızı çox sevsək də, mütəxəssislər bu dövrdə onun istehlakına ehtiyatla yanaşmağı tövsiyə edirlər. Son zamanlar bu giləmeyvədən zəhərlənənlərin sayı da az deyil.

Mütəxəssislər bildirirlər ki, sağlam və təhlükəsiz qarpız istehlakı üçün ən münasib vaxt iyul ayından başlayır.

“Qarpızın təbii şəkildə yetişmə dövrü iyulun sonu, avqustun əvvəlləridir. Bəzi fermerlər onun daha tez yetişməsi üçün müxtəlif dərmanlardan istifadə edirlər. Bu səbəbdən zəhərlənmə halları baş verir.

Torpağa azot tərkibli gübrələr verilir və normaya əməl olunmadıqda həddindən artıq çox gübrə verilməsi qarpızın tərkibində nitratın miqdarını artırır. Çox vaxt isə yol kənarında satılan qarpızlar günün altında saatlarla, bəzən günlərlə qalır və nəticədə, keyfiyyətini itirir, zəhərlənməyə səbəb olur”, – deyə sağlam qida təbliğatçısı Asim Vəliyev bildirib.

Ekspert qeyd edib ki, qarpızı kəsməzdən əvvəl mütləq yumaq lazımdır: “Kəsdikdən sonra iki saatdan artıq otaq temperaturunda saxlamaq olmaz. Soyuducuda isə 1 gündən artıq saxlamaq tövsiyə edilmir”.

Həkimlərin sözlərinə görə, qarpız qaraciyər, mədə və ürək xəstəlikləri zamanı istifadə edilən pəhriz reseptlərinə daxildir. Böyrəklərdəki daş və duzları əritmək üçün də bu giləmeyvə ən yaxşı vasitələrdən biri hesab olunur. Həmçinin piylənmə problemi olan insanlar qarpızdan daha çox istifadə edə bilərlər.