Lökbatan sakinləri su probleminin illərdir həll olunmamasından narazılıq edir - Baku TV

Qaradağ rayonunun Lökbatan qəsəbəsi, 24-cü binanın sakinləri uzun müddətdir ki, içməli su problemi ilə üz-üzə qalıblar.

Onların sözlərinə görə, gün ərzində mənzillərə, ümumiyyətlə, su verilmir. Su yalnız gecə saatlarında və zəif təzyiqlə gəlir. Məhz bu səbəbdən vətəndaşlar məcburən gecə saatlarında su ehtiyatı toplayırlar.

Sakinlərin sözlərinə görə, məsələ ilə bağlı aidiyyəti qurumlara dəfələrlə müraciət edilsə də, indiyədək problemin həlli istiqamətində heç bir addım atılmayıb.

“Yay başlayandan əziyyət çəkirik. Özüm onkoloji xəstəyəm. Gündüzlər su gəlmir, gecələr isə damcı-damcı yığmağa məcbur oluram. Su olmadan həyat ola bilərmi?!”, – vətəndaşlardan biri söyləyib.

Digər bir sakin isə vurğulayıb: “Evdə iki xəstəm var. Su yalnız gecə gəlir. Yataq xəstəsinə həmin saatda necə baxım, paltarını necə yuyum? Çox əziyyət çəkirik”.