Məktəbin qarşısında təhlükəli vəziyyət yarandı

Binəqədi rayonu, Rəsulzadə qəsəbəsində Milli Qəhrəman Fərhad Hümbətov adına parkdakı ağaclardan biri aşmaq üzrədir.

Ağac 99 nömrəli orta məktəbin girişinin yaxınlığındadır. Sakinlər parkda digər ağacların da quruduğunu və bu səbəbdən təhlükəli vəziyyət yarandığını bildiriblər.

“Güclü külək olsa, bu ağac hər an aşa bilər. Nə vaxtsa fəsad törədəcək”, – sakin deyib.

Məsələ ilə bağlı Rəsulzadə bələdiyyəsindən bildirilib ki, abadlıq işləri aparılan zaman parkda bir neçə ağacın qurumuş və qəzalı vəziyyətdə olduğu müəyyən edilib:

“Bununla bağlı 16 mart 2024-cü il tarixli məktubla Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinə müraciət etmişik. Hələ məsələ ilə bağlı cavab verilməyib. Ağacların götürülməsinə rəy veriləndən sonra onlar götürülə bilər”.

Dövlət Ekoloji Ekspertiza Agentliyindən sözügedən ünvandakı qurumuş və qəzalı ağacların kəsilməsinə dair müraciətin daxil olduğu təsdiqlənib. Qurumdan bildirilib ki, hazırda icra mərhələsində olan müraciətə qanunamüvafiq qaydada münasibət bildiriləcək.